Mehdiyev-Kərimli tandemi: Köhnə oyun, yeni fiasko

Siyasətdə zaman-zaman elə tandemlər yaranır ki, ilk baxışdan onlar tandem deyil, tam əks qütb kimi görünür, amma əslində hansısa qaranlıq məqamda onların yolları kəsişir.

Ramiz Mehdiyev və Əli Kərimli də bu kateqoriyadandır - biri uzun illər sistemin içində "Boz kardinal" və ya "beşinci kolon"un memarı kimi tanınan, digəri isə illərdir siyasətdə davamlı narazılıq ilə fəaliyyət göstərən müxalif sima. Bu iki xəttin kəsişməsi çoxlarına qəribə gəlsə də, məlum olub ki, ortada ümumi maraq varmış: hakimiyyətə gedən qaranlıq yol.

Belə ki, Azərbaycan Xalq Cəbhəsi Partiyasının (AXCP) sədri Əli Kərimlinin yaşadığı mənzildə bu gün Dövlət Təhlükəsizliyi Xidmətinin (DTX) əməkdaşları tərəfindən axtarış aparılıb.

BAKU.WS Oxu.Az-a istinadən xəbər verir ki, Əli Kərimli barəsində araşdırma Prezident Administrasiyasının sabiq rəhbəri Ramiz Mehdiyevin cinayət işi çərçivəsində aparılır.

Bu isə əbəs deyil. Çünki bir müddət əvvəl Ramiz Mehdiyevin özü Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunaraq barəsində ev dustaqlığı qətimkan tədbiri seçilmişdi.

Ona görə də bu prosesin mərkəzində iki adın - Prezident Administrasiyasının sabiq rəhbəri Ramiz Mehdiyev və AXCP lideri Əli Kərimlinin adının dayanması təsadüfi deyil.

Prosesdə əsas təhlükə mənbəyi görünən tərəflərdən biri, ya da elə birincisi Rusiya amilidir. Haqlı sual yaranır ki, bəs "Moskva küləyi" niyə həmişə eyni istiqamətdən əsir?

Qeyd etmək yerinə düşər ki, Mehdiyev də, Kərimli də zaman-zaman Moskvanın orbitinə yaxınlaşmaqla gündəmə gəliblər. Biri SSRİ-nin "siyasi laboratoriyasından" çıxmış, digəri isə uzun illərdir Qərb, Rusiya və regiondakı siyasi kuluarların istiqamətini öz maraqlarına uyğunlaşdırmağa çalışan fiqur olub. Bu tandem elə bil ki, iki fərqli cinsdən olan, amma eyni havada uçan iki quşu xatırlatsa da, nəticədə hər ikisi eyni ağacın üzərinə qonmağa çalışıb - Rusiyanın çürüməkdə olan təsir ağacı.

Bəs sövlətə xəyanətin cəzası nədir?

Dövlətə xəyanət təkcə hüquqi anlayış deyil, həm də siyasi yaddaş məsələsi və ən yüksək təhlükəsizlik xəttinin qırılması deməkdir. Ona görə də kimliyindən asılı olmayaraq - istər vəzifədə olsun, istərsə də müxalifətdə - konstitusion sistemə qənim kəsilən hər kəsin aqibəti eyni olur. Bu baxımdan, Mehdiyev - Kərimli xəttinin araşdırılması nə emosional reaksiyadır, nə də siyasi göstəriş, bu, dövlət təhlükəsizliyinin qorunmasıdır. Dövlət isə təhdid altında qalmaq üçün yox, yaşamaq və yaşatmaq üçün qurulur.

Kölgədəki fiqurlar və ya səhnəyə çıxmaq istəyib, amma işıqdan qorxan aktyorlar kimlərdir?

Mehdiyev və Kərimli xəttinə cəlb olunan digər şəxslər də olub. Bu xətdə müxtəlif səviyyələrdə vəzifədən getmiş və Mehdiyevin təsiri altında olan keçmiş məmurlar, radikal müxalifətyönümlü şəxslər, habelə bəzi Qərb və Rusiya siyasi dairələri ilə əlaqəsi iddia edilən aktorlar da yer alıblar. Onların fəaliyyət prinsipləri isə eynidir. Tribunadan şüarlar səsləndirmək, gizli planlar qurmaq, nəhayət xaricdən "məsləhət" alıb mənfur niyyətlərini həyata keçirmək. Amma nəticədə hamısı bir şeyi unudublar: şou ilə dram fərqlidir və ona görə də dövlət teatrında improvizasiya risklidir. Bu baxımdan, bu gün DÖVLƏT pərdəarxasında da, səhnədə də xəyanətə əli bulaşan hər kəsi eyni tərzdə sorğu-sual edir.

Bir sözlə, bu fiqurların məqsədi bir olsa da - hakimiyyəti zorla ələ keçirmək - Azərbaycan dövlətinin sərt və çevik təhlükəsizlik sistemi bu cəhdlərin qarşısını vaxtında aldı.