FTX rəhbəri: Qərb İrəvanı Bakı ilə danışıqları uzatmağa məcbur edir

Qərb Ermənistanı Kollektiv Təhlükəsizlik Müqaviləsi Təşkilatından (KTMT) çıxmağa məcbur edir və bununla NATO-dan daha çox asılı hala gətirmək istəyir.

BAKU.WS xəbər verir ki, bu sözləri Rusiyanın Federal Təhlükəsizlik Xidmətinin (FTX) rəhbəri Aleksandr Bortnikov MDB-yə üzv ölkələrin təhlükəsizlik və xüsusi xidmət orqanlarının rəhbərləri Şurasının (SORBS) 55-ci iclasında bildirib.

Onun sözlərinə görə, Qərb Ermənistana silah tədarükündə güzəştlər və təhlükəsizlik zəmanəti əvəzində KTMT-dən çıxmağı tələb edir: "Bu, Ermənistanı NATO-nun təsirinə daha çox məruz qoyacaq və onun Bakı ilə gələcək münasibətlərinə daha çox təsir edəcək".

FTX rəhbəri əlavə edib ki, Qərb İrəvanı Bakı ilə danışıqları uzatmağa məcbur etməklə Ermənistan-Azərbaycan münaqişəsinin həlli prosesində liderlik etməyə çalışır:

"NATO-nun Cənubi Qafqazda möhkəmlənməsi regionda sabitliyə xidmət etməyəcək, çünki təşkilatın müxtəlif bölgələrdə vasitəçilik təcrübəsi uğurlu olmayıb".