Əsirlikdə olan Bayram Kərimovdan xəbər var

İkinci Qarabağ döyüşlərində düşmən tərəfə əsir düşən Gəncə şəhər sakini Bayram Kərimov Beynalxalq Qırmızı Xaç Komitəsi tərəfindən ailəsinə xəbər göndərib.

Bu barədə BAKU.WS-in bölgə müxbirinə B.Kərimovun atası Yaşar Kərimov bildirib.

"Beynalxalq Qırmızı Xaç Komitəsindən bizə dedilər ki, övladınız xəbər göndərib. Xəbərdə yaxşı olduğunu bildirib. Belindən aldığı yara artıq sağalır və otura bildiyini deyib. Bizim yazdığımız məktubu da oxuyub, amma məktub yazmayıb. Deyib sadəcə bizə çatdırsınlar ki, yaxşıdır", - Yaşar Kərimov əlavə edib.

Qeyd edək ki, B.Kərimov könüllü olaraq Qarabağ savaşına qatılıb və Şuşa istiqamətində gedən döyüşlərdə yaralanıb və əsir düşüb.

B.Kərimovun bir azyaşlı övladı var.