Deputat: "Ramiz Mehdiyev və Əli Kərimlinin siyasi xətti eyni məqsədə xidmət edir"

"Ramiz Mehdiyev və Əli Kərimli formal olaraq fərqli ideologiyaların təmsilçiləri kimi görünsələr də, onların uzun illər ərzində formalaşdırdıqları siyasi davranış xətti əslində eyni məqsədlərə xidmət edən və bir-birini tamamlayan strategiyalar üzərində qurulub".

BAKU.WS Oxu.Az-a istinadən xəbər verir ki, bu fikirləri Milli Məclisin deputatı, YAP İdarə Heyətinin üzvü Kamal Cəfərov deyib.

Deputat bildirib ki, Ramiz Mehdiyev uzun illər siyasi sistem daxilində özünəməxsus "paralel" idarəçilik mexanizmi yaratmağa çalışıb:

"O, siyasi prosesləri idarə etmək iddiasında olub və heç kimə sirr deyil ki, müxtəlif üsullardan istifadə etməklə qərarverici strukturlar üzərində nəzarət qurmağa cəhd göstərib. Digər tərəfdən, Əli Kərimli daim institusional siyasi prosesdən kənarda qalaraq radikal ritorika və kütləvi təzyiq taktikasına üstünlük verən xətti ilə tanınıb. Bu iki paralel siyasi xətt əslində strateji səviyyədə bir-birini tamamlayan davranış modelləri ortaya qoyur: hakimiyyətə təsir göstərmək iddiası, siyasi institutlar deyil, şəxsi nüfuz amillərini önə çəkmək, daxili sabitliyi pozmağa yönəlmiş davamlı gərginlik mühiti yaratmaq və xarici regional proseslərdən daxili siyasi təzyiq vasitəsi kimi istifadə etmək. Bu oxşarlıqlar onların fəaliyyətində təsadüfi paralellər deyil, sistemli şəkildə uzlaşan eyni siyasi xəttin nəticəsidir.

Bu mənzərəni göstərən ən sadə nümunələrdən biri Ramiz Mehdiyevin Prezident Administrasiyasına rəhbərlik etdiyi dövrdə AXCP-nin mitinq fəaliyyətinə yaradılan süni "imkan pəncərələri", ictimai rezonansın şişirdilməsi və mitinq iştirakçıları ilə bağlı saxta statistik məlumatların təqdim olunmasıdır".

Deputat əlavə edib ki, vaxtilə gündəmə gətirilən "Qafqaz baharı", Rusiyada yaradılan "Milyarderlər İttifaqı", "Ziyalılar Forumu", "Milli Şura" layihəsi və digər uğursuz təşəbbüslər həmin dövrdə ölkədə baş verən gərginliklərin arxasında xaricdən idarə edilən antimilli əməkdaşlıq mexanizmlərinin və xəyanətin dayandığını göstərir:

"Ramiz Mehdiyev və Əli Kərimli xəttinin son aylarda yenidən aktivləşməsi də təsadüfi deyil və regionda baş verən geosiyasi dəyişikliklərin yan təsiridir. Hazırda Cənubi Qafqaz ciddi transformasiya mərhələsindən keçir; regional güclər arasında balansın dəyişməsi, xüsusilə də Rusiya-Ukrayna müharibəsinin postkonflikt mərhələsinə keçməsi fonunda Moskvanın bölgədə təsir dairələrini bərpa etmək cəhdlərinin güclənəcəyi ehtimal edilir.

Belə şəraitdə, radikal mövqeləri və qeyri-institusional davranış ənənələri ilə tanınan yerli antimilli siyasi aktorların, Rusiyada yaşayan azərbaycanlıların və bəzi diaspora nümayəndələrinin bu prosesdə alətə çevrilməsi real təhlükə kimi qiymətləndirilməlidir. Açıq şəkildə demək lazımdır ki, Ramiz Mehdiyev-Əli Kərimli xəttində illərdir müşahidə edilən paralellər, onların siyasi davranış modelləri və bu davranışların xarici təsirlər tərəfindən yönləndirilməsi artıq təkcə siyasi müzakirə mövzusu deyil, bu, dövlət təhlükəsizliyi məsələsidir. Ümid edirik ki, Azərbaycan dövlətinə qarşı xəyanətə cəlb olunan dairənin - o cümlədən Ramiz Mehdiyevə gizli dəstək verən, qapalı şəkildə rəğbət bildirən, xarici dövlətlərin tapşırıqlarını icra etməyə hazır olan və barələrində ciddi kompromat məlumatları mövcud olan şəxslərin kimliyi yaxın zamanda müəyyən ediləcək və onların barəsində hüquqi tədbirlər görüləcək.

Dəyişən dünya nizamında Azərbaycan dövlətinin güclü, ədalətli və ən əsası müstəqil siyasətinə qarşı çıxan ölkə daxilindəki bütün radikal qrupların və təsir dairələrinin vaxtında zərərsizləşdirilməsi milli təhlükəsizlik baxımından tam legitimdir və həyati əhəmiyyət daşıyır".