Güclü küləyə görə Şəmkirdə dam örtüyü uçan məktəbin şagirdləri köçürülüb

Tədris prosesinin fasiləsizliyini təmin etmək məqsədilə Şəmkirdə güclü küləyə görə dam örtüyü aşan məktəbin şagirdləri müvəqqəti olaraq Şəmkir rayonu Vüqar Alırzayev adına İrmaşlı kənd tam orta ümumtəhsil məktəbinə köçürülüblər.

BAKU.WS xəbər verir ki, bu barədə apa-ya Qazax-Tovuz Regional Təhsil İdarəsindən məlumat verilib.

Qeyd olunub ki, məktəbin dam örtüyünə dəyən zərərin qiymətləndirilməsi və müvafiq təmir işlərinin aparılması üçün təhsil müsəssisəsinə ilkin baxış keçirilib. Yaxın günlərdə təmir işlərinə start veriləcək.

Xatırladaq ki, dünən müşahidə edilən güclü külək Şəmkir rayonu Qalib Allahverdiyev adına Şiştəpə kənd tam orta ümumtəhsil məktəbinin dam örtüyünü aşırıb.

***14:26

Şəmkirdə güclü külək fəsadlar törədib.

BAKU.WS qafqazinfo-ya istinadən xəbər verir ki, güclü külək rayonun Şiştəpə kəndində yerləşən Qalib Allahverdiyev adına tam orta məktəbin dam örtüyünü uçurub. Xəsarət alan olmayıb.

Bu gündən müvəqqəti olaraq məktəbin şagirdlərinin tədrisini qonşu Vüqar Alırzayev adına İrmaşlı kənd tam orta ümumtəhsil məktəbində davam etdirməsi nəzərdə tutulur.

Qeyd edək ki, 2000-ci ildə inşa edilən məktəb 340 şagird yerlikdir.

Qalereya