Naxçıvanda erkən nikahın qarşısı alınıb

Naxçıvanda erkən nikahın qarşısı alınıb.

BAKU.WS "Nuhçıxan"a istinadən xəbər verir ki, Şahbuz rayon Gömür kənd sakini 2000-ci il təvəllüdlü A.C (ad və soyad şərtidir) tərəfindən Şahbuz rayonu Gömür kənd sakini yetkinlik yaşına çatmayan 2008-ci il təvəllüdlü Z.A (ad və soyad şərtidir) qaçırılaraq erkən evliliyə cəhd edib.

Həmin məlumatlar əsasında Naxçıvan Muxtar Respublikası Ailə Qadın və Uşaq Problemləri üzrə Dövlət Komitəsinin əməkdaşı və Şahbuz Rayon İcra Hakimiyyətində yaradılmış Məişət zorakılığının qarşısının alınması sahəsində monitorinq və əlaqələndirmə qrupu üzvlərinin iştirakı ilə məsələ yerindəcə araşdırılıb və tərəflərin yaşadığı ünvana baxış keçirilib, valideynləri ilə qanunamüvafiq söhbətlər aparılaraq uşaq hüquqlarını pozan bu halların qanunvericiliyin tələblərinə zidd olduğu diqqətə çatdırılıb.

Beləliklə də aidiyyəti təşkilatların nümayəndələrinin səyi nəticəsində erkən evliliyin qarşısı alınıb. Həyata keçirilən müvafiq proseslərdən sonra yetkinlik yaşına çatmayan Z.A (ad və soyad şərtidir) ailəsinin yanına qaytarılıb.