Ağstafaya güclü dolu yağıb: Evlərə, təsərrüfatlara ziyan dəyib

Azərbaycanın bölgələrində qeyri-sabit hava şəraiti davam edir.

Ağstafaya yağan güclü dolu ciddi fəsadlara yol açıb, rayonun Yenigün, Qaçaq Kərəm, Xətai, Aşağı Göycəli, Qırılı və digər kəndlərində evlərin dam örtüyünə, çardaqlara, avtomobillərə ciddi ziyan vurub.

Sakinlərin sözlərinə görə, bu ərazidə indiyədək belə güclü dolu müşahidə olunmayıb. Onlar bildiriblər ki, təxminən 20 dəqiqə davam edən dolu əkin sahələrindəki məhsulları tamamilə məhv edib.

Qeyd edək ki, hazırda Ağstafa Rayon İcra Hakimiyyətinin nəzdində fəaliyyət göstərən Fövqəladə Hallar Komissiyası tərəfindən kəndlərə dəyən ziyanın həcmi müəyyənləşdirilir.