055 213 76 73
Ermənistan mətbuatı ermənilərin Ağdərədən kütləvi şəkildə qaçaraq Xankəndinə sığındıqları haqda məlumat yayıb.
BAKU.WS-in eadaily.com-a istinadən verdiyi məlumata görə, adının çəkilməsini istəməyən erməni Tərtərin Talış və ətraf yaşayış məntəqlərindəki sakinlərinin bu ərazilərdən Seysulan kəndinə qaçdıqlarını bildirib. Ancaq ermənilər burada da qərar tutmayaraq Xankəndinə doğru axışırlar. Onlar heç kimin onlarla maraqlanmadığını və başıpozuq şəkildə Xankəndinə doğru getdiklərini bildiriblər.
Qeyd edək ki, Azərbaycan Müdafiə Nazirliyi bu gün yaydığı məlumatda cəbhədə baş verənlərə münasibət bildirib.
Məlumatda deyilirdi: Hərbi cəhətdən iflasa uğrayan Ermənistan kriminal rejimi son vaxtlar cəbhədəki uğursuzluqlarının, canlı qüvvə və döyüş texnikası sarıdan xeyli itkisinin əvəzini çıxmaq məqsədilə növbəti dəfə təxribat törətməyə çalışıb.
Aprelin 2-nə keçən gecə bütün cəbhəboyu mövqelərimiz iriçaplı silahlar, minaatanlar, qumbaraatan və artilleriya qurğularından intensiv atəşə tutulub. Eyni vaxtda qoşunların təmas xəttinə yaxın mülki əhalinin kompakt yaşadığı bir sıra yaşayış məntəqələri də düşmən atəşinə məruz qalıb. Qarşı tərəfin hərbi aktivliyini genişləndirməyə imkan verməmək, onun fəaliyyətinin qarşısını almaq məqsədilə Silahlı Qüvvələrimizin komandanlığı tərəfindən əməliyyat şəraiti qiymətləndirilərək dərhal cavab tədbirlərinin görülməsi üçün qərar verilib.
Cəbhənin ən gərgin Ağdərə-Tərtər-Ağdam və Xocavənd-Füzuli istiqamətində yerləşən birliklər, artilleriya bölmələri və digər qoşun növlərinin birgə, əlaqəli fəaliyyəti nəticəsində qısa müddətdə Ermənistan silahlı bölmələrinə qarşı cavab tədbirləri həyata keçirilir.
Cəbhəboyu zonada baş verən hadisələrlə bağlı mətbuata və ictimaiyyətə əlavə məlumat veriləcək.
Kütləvi informasiya vasitələri nümayəndələrini rəsmi olmayan, dəqiqləşdirilməmiş və qeyri-obyektiv məlumatlardan istifadə etməməyə çağırırıq.