Bitcoin 100 min dollar həddinin altına düşdü

Dünyanın ən böyük kriptovalyutası olan Bitcoin, iyundan bəri ilk dəfə 100 min dolların altına enib. Qiymətin düşməsinə ABŞ Federal Ehtiyat Sisteminin (FED) faiz dərəcələrini endirməyə tələsməməsi və texnologiya sektorundakı yüksək dəyər qiymətləndirmələri ilə bağlı narahatlıqlar səbəb olub.

BAKU.WS xəbər verir ki, CoinMarketCap platformasının məlumatına görə, son 24 saatda qlobal kriptovalyuta bazarının ümumi dəyəri 6,5 faiz azalaraq 3,31 trilyon dollara düşüb. Bitcoin-in qiyməti isə 5,8 faizdən çox azalaraq 23 iyundan bəri ilk dəfə 100 min dolların altına enib. Hazırda o, təxminən 100 min 768 dollar səviyyəsində ticarət olunur.

Ekspertlər bildirirlər ki, investorlar FED-in növbəti qərarlarını ehtiyatla izləyir, xüsusilə də Asiya bazarlarında mümkün korreksiya riskləri ilə bağlı xəbərdarlıqlar artır.

Bazarın ikinci ən böyük kriptovalyutası olan Ethereum da bu enişdən təsirlənib - onun qiyməti 10 faiz azalaraq 3 210 dollara düşüb.

Analitiklər qeyd edirlər ki, kriptovalyuta bazarındakı bu dalğalanma həm qlobal iqtisadi qeyri-müəyyənlik, həm də investorların riskdən qaçma meyillərinin artması ilə əlaqədardır.