Yunanıstanda 4 günlük matəm elan edilib

Yunanıstanda keçmiş Baş nazir Kostas Simitisin vəfatı ilə əlaqədar 4 günlük matəm elan edilib.

BAKU.WS xəbər verir ki, Yunanıstan Dövlət Televiziyası ERT-in məlumatına görə, 88 yaşında dünyasını dəyişən Simitisin dəfn mərasiminin xərcləri dövlət büdcəsindən ödəniləcək.

Mərasim 9 yanvar tarixində yerli vaxtla saat 12:00-da "baş nazirlik vəzifəsində olarkən dünyasını dəyişən şəxs üçün tətbiq edilən protokol" çərçivəsində keçiriləcək.

Milli matəm elan edilməsi ilə əlaqədar 4 gün ərzində bütün dövlət qurumlarında bayraqlar yarıya endiriləcək.

Qeyd edək ki, bu gün səhər təcili yardımla Korinf Xəstəxanasına aparılan Simitisin xəstəxanaya çatdıqda həyatını itirdiyi müəyyən edilib.

1936-cı il təvəllüdlü Simitis Yunanıstanda dəfələrlə hakimiyyətdə olmuş PASOK partiyasının qurucularından biri idi. O, PASOK hakimiyyəti dövründə bir neçə dəfə nazir postunu tutmuş, 1996-2004-cü illərdə həm partiya lideri, həm də Baş nazir vəzifələrində çalışmışdı.

Hüquq və iqtisadiyyat üzrə təhsil almış Simitis bir çox universitetdə dərs demişdi.