Ukrayna Trampın sülh planının bəzi bəndləri ilə razılaşmayıb

Ukrayna ABŞ prezidenti Donald Trampın Rusiya ilə münaqişənin həlli üzrə təklif etdiyi planın bir sıra bəndlərini qəbul etmir.

BAKU.WS xəbər verir ki, bunu Ukraynanın BMT-dəki nümayəndəsi Xristina Qayovişin bildirib.

BMT Təhlükəsizlik Şurasının iclasında çıxış edən Qayovişin təsdiqləyib ki, Ukrayna Trampın planını alıb və onun üzərində konstruktiv işləməyə hazırdır. Lakin Kiyevin keçməyə hazır olmadığı sarsılmaz qırmızı xətlər var.

Diplomatın sözlərinə görə, Ukrayna özünümüdafiə hüququnun məhdudlaşdırılmasına, silahlı qüvvələrin sayına və imkanlarına dair istənilən məhdudiyyətə razı olmayacaq. Həmçinin ölkənin suverenliyinə istənilən şəkildə müdaxilə edilə bilməz. Buna suveren şəkildə ittifaqları - o cümlədən NATO-ya üzvlüyü seçmək hüququ da daxildir.

Qayovişin həmçinin ilk addım kimi cəbhə xətti boyunca atəşin dayandırılmasına çağırıb və bundan sonra sülh danışıqlarına başlanmalı olduğunu qeyd edib. O xatırladıb ki, Trampın planında cəbhə xəttinin konfiqurasiyasına dair razılıq əldə edildikdən sonra, yəni Ukrayna Silahlı Qüvvələrinin Donbasdan çıxmasından sonra atəşkəs nəzərdə tutulur.

Bundan əlavə, Ukraynanın nümayəndəsi qeyd edib ki, Kiyev Rusiyanın ələ keçirdiyi əraziləri tanımır. Diplomat əlavə edib ki, Ukrayna rus dilini ölkənin daha bir rəsmi dili etmək niyyətində deyil.