Rusiya hərbçiləri Ukraynaya məxsus "MİQ-29" qırıcısını vurub

Rusiyanın hava hücumundan müdafiə sistemləri xüsusi əməliyyat zonasında "MiQ-29" qırıcı təyyarəsini, ABŞ istehsalı olan üç "HIMARS" raketini və Ukrayna Silahlı Qüvvələrinin (UAF) 37 pilotsuz uçuş aparatını vurub.

Bu barədə Rusiya Müdafiə Nazirliyi məlumat yayıb.

Qırıcının hansı bölgədə vurulduğu açıqlanmır.

Məlumata görə, Rusiyanın Ukraynada xüsusi hərbi əməliyyatı başlayandan indiyədək 642 təyyarə, 283 helikopter, 30 987 PUA, 575 zenit-raket kompleksi, 17 811 tank və digər texnika sıradan çıxarılıb.

"The Wall Street Journal" yazır ki, ötən həftə Ukrayna "F-16" qırıcılarından birini də itirib.