Pezeşkian Yaxın Şərqdəki münaqişənin indi başa çatdırılmasına çağırıb

İran güclü geosiyasi mövqeyə malikdir və buna görə də Yaxın Şərqdəki münaqişəni hazırda əlverişli şərtlərlə başa çatdırmaq mümkündür.

BAKU.WS xəbər verir ki, bu barədə İran Prezidenti Məsud Pezeşkian Etemad Online agentliyinə açıqlamasında bildirib.

"Müharibə müəyyən bir mərhələdə başa çatmalıdır. Bizim güclü mövqedə olduğumuz, hörmət qazandığımız və bütün dünyanın qələbəmizi qəbul etdiyi indiki vaxtda müharibəni başa çatdırmaq daha yaxşıdır. Dünya həmçinin ABŞ-nin qaydaları pozaraq məktəblərimizə, xəstəxanalarımıza və infrastrukturumuza hücum etdiyini görür", – deyə dövlət başçısı vurğulayıb.

Qeyd edək ki, avqustun 20-də ABŞ Prezidenti Donald Tramp İran üzərində yeni iqtisadi təzyiq kampaniyasına başladığını açıqlayıb. Tramp bu kampaniyanı "iqtisadi D-Day" adlandırıb.

Ağ Ev rəhbəri Vaşinqtonun Tehranın maksimum təcridinə nail olmağa çalışacağını və İranla ticarət və maliyyə əlaqələrini qorumağa kömək edən xarici strukturlara qarşı tədbirlər görəcəyini bildirib.

Mümkün sanksiyalar çərçivəsində banklar, şirkətlər, neft vasitəçiləri və İranla əməliyyatlarda iştirak edən digər qurumların, o cümlədən Rusiya strukturlarının hədəfə alınması nəzərdə tutulur.