Moskvada terror aktına hazırlaşmaqda şübhəli bilinən yeniyetmə saxlanılıb

BAKU.WS xəbər verir ki, TASS-ın məlumatına görə, şübhəli ilə bağlı məlumat onun "TikTok"da paylaşdığı videodan əldə edilib. Yeniyetmənin paytaxtdakı "Saritsıno" muzey-qoruğunda terror aktı planlaşdırdığı ehtimal olunur.

Məlumata əsasən, yeniyetmə "Telegram"da neonasist məzmunlu kanala abunə olub və kütləvi qətllərlə bağlı məlumatlar axtarıb. O, sosial şəbəkədə taktiki geyimdə, eynək və qulaqlıqla çəkilmiş fotolarını, həmçinin silahabənzər əşya ilə görüntülərini paylaşıb. Muzey-qoruğunda çəkdirdiyi fotolardan birini isə "Mən bir yer tapdım" qeydi ilə yayımlayıb.

FTX-nin məlumatına görə, yeniyetmənin evində videoda görünən əşyalar aşkarlanıb.

Qeyd edək ki, oktyabrın 31-də FTX ABŞ tərəfinin Moskvada terror aktına hazırlıqla bağlı məlumat verdiyini açıqlamışdı. Bundan sonra "Saritsıno" muzey-qoruğunun ərazisinə giriş müvəqqəti məhdudlaşdırılmışdı.