Los Ancelesdə baş verən yanğında ölənlərin sayı 24-ə çatıb

Los Ancelesdə və ətraf bölgələrdə davam edən meşə yanğınlarında 100 mindən çox insanın hələ də təxliyə əmri altında olduğunu bildirən yerli rəsmilər fəlakətin 24 nəfərin həyatına son qoyduğunu açıqlayıb.

BAKU.WS xəbər verir ki, bu barədə haber global məlumat yayıb.

Ərazi rəisi Robert Luna mətbuat konfransında Palisades və Eaton yanğınlarına görə 105 min nəfərin təxliyə edildiyini, 87 min nəfərin isə təxliyə xəbərdarlığı aldığını bildirib. "Bu bölgələr müharibə meydanına bənzəyir. Elektrik dirəkləri aşıb, xətlər yerə düşüb, bəzi yerlərdə hələ də yanğınlar var. Bu ərazilər təhlükəsiz deyil," - deyə Luna əlavə edib.

Şəhər Yanğınsöndürmə Xidməti rəhbəri Kristin Krouli Palisades bölgəsində aktiv yanğınların davam etdiyini və əhalinin təhlükəsizliyini təmin etmək üçün ərazinin hazırda geri dönüş üçün uyğun olmadığını deyib. "Yanğın bölgəsində elektrik və su yoxdur, qaz boruları qırılıb, tikililər təhlükəli vəziyyətdədir," - deyə o bildirib.

İlk müdaxilə qruplarının Palisades və Eaton yanğınlarını müvafiq olaraq 11% və 27% nəzarət altına aldıqları qeyd olunsa da, vəziyyətin tam olaraq nəzarətə götürülməsi üçün səylər davam edir.

Yanğınların yol açdığı ziyanların ilkin hesablamalara görə 57 milyard dollar olduğu, lakin bəzi müstəqil təxminlərdə bu rəqəmin 135-150 milyard dollar arasında dəyişə biləcəyi bildirilib.

Həmçinin, Los Ancelesdə meşə yanğınlarından zərər çəkənlərə yardım məqsədilə yaradılmış Kaliforniya İcma Fonuna indiyədək 6 milyon dollar ianə toplanıb.

ABŞ-nin yeni seçilmiş prezidenti Donald Tramp Truth Social sosial media platformasında Los Ancelesdəki yerli rəhbərliyi tənqid edib. "Bunlar ölkəmizin tarixindəki ən böyük fəlakətlərdən biridir. Minlərlə möhtəşəm ev məhv oldu və daha çoxu məhv olacaq. Ölüm hər yerdədir. Bu yanğınları söndürə bilmirlər. Problem nədədir?" - deyə o paylaşım edib.

Yanğınlar zamanı qanunsuz əməllərə görə 29 nəfərin həbs olunduğu, onların arasında saxta yanğınsöndürən geyimi geyinərək oğurluq edən şəxslərin də olduğu bildirilib.

Yanğın nəticəsində artıq 37 min akrdan çox ərazi kül olub, 12 mindən artıq tikili ziyan görüb, 57 min tikilinin isə yanğın riski altında olduğu açıqlanıb. Rəsmi şəxslər ölü sayının artmasından narahatdır.