Ətyeyən dəniz canlısı növü kəşf edilib

Dünya Okeanının ən dərin hissəsində yeni ətyeyən dəniz canlısı növü kəşf edilib. Hondrocladia adlı yırtıcı süngər Antarktida sahillərində Montague adasının 3,6 kilometr şərqində tapılıb.

BAKU.WS xarici KİV-ə istinadən xəbər verir ki, növ qeyri-rəsmi olaraq "ətyeyən ölüm topu" adlandırılıb.

Məlumata görə, süngərin kiçik qarmaqlarla örtülmüş uzun çıxıntıları var. Bunlar ona kopepodlar kimi kiçik xərçəngkimiləri tutmağa imkan verir. Bu çıxıntılar diametri bir neçə santimetr olan sferik çıxıntılarla bitir.

Alimlər qeyd ediblər ki, əksər süngərlər digər canlıları yemir, əksinə qidanı süzgəcdən keçirir. Bu növ olduqca qeyri-adi hesab olunur, çünki kiçik amfipodları tutur, onları yavaş-yavaş əhatə edir və qida maddələrini "sıxır".

Tədqiqat məsafədən idarə olunan sualtı vasitədən istifadə etməklə aparılıb. Model 4,5 kilometrə qədər dərinlikdəki dəniz mühitlərini skan etmək üçün nəzərdə tutulub. Ekspedisiya, əvvəllər məlum olmayan 30 dərin dəniz növü də daxil olmaqla, 14 heyvan qrupundan təxminən 2000 nümunə toplayıb.

Alimlər izah ediblər ki, süngərlər bütün həyatlarını bir yerdə keçirən oturaq orqanizmlərdir. Ov edə bilmədikləri üçün qida əldə etmək üçün səmərəli vasitələrə ehtiyac duyurlar.