Dəməşqdə kilsədə intihar hücumu – 25 ölü, onlarla yaralı

Suriyanın paytaxtı Dəməşqin şərqində yerləşən Duveyla rayonundakı yunan kilsəsində ibadət zamanı partlayış baş verib.

BAKU.WS xəbər verir ki, bu barədə Suriya dövlət xəbər agentliyi "SANA" məlumat yayıb.

Bildirilir ki, partlayıcı qurğu terrorçu-kamikadze tərəfindən işə salınıb. Hadisədən əvvəl həmin şəxs kilsəyə toplaşan insanlara atəş açıb, əl qumbaraları atıb və daha sonra üzərindəki partlayıcı qurğunu işə salaraq özünü partladıb.

İlkin məlumatlara əsasən, hücum nəticəsində azı 25 nəfər həyatını itirib, çox sayda insan isə yaralanıb. Yaralıların vəziyyəti barədə məlumat verilməyib. Hadisə yerinə təcili yardım və təhlükəsizlik qüvvələri cəlb olunub.