ABŞ-dən genişmiqyaslı hərbi hazırlıq siqnalları: Son 72 saatda...

ABŞ-nin Yaxın Şərqdəki hərbi hava aktivliyi son 72 saatda nəzərəçarpacaq dərəcədə artıb.

BAKU.WS xəbər verir ki, açıq mənbələrdən əldə edilən uçuş məlumatlarına görə, bölgə üzrə yüzlərlə hərbi uçuş həyata keçirilib və bu vəziyyət "genişmiqyaslı hazırlıq" ehtimallarını gündəmə gətirib.

ABŞ Hərbi Hava Qüvvələrinə aid "KC-135" və "KC-46" tipli tanker təyyarələri ilə Körfəz bölgəsi ətrafında ən azı 89 hava yanacaq doldurma missiyası yerinə yetirilib.

Bu tip əməliyyatlar döyüş təyyarələrinin uzun müddət havada qalmasını təmin edən əsas logistika elementlərindən biridir.

Əvvəlki məlumatlara əsasən, ABŞ son dövrlərdə bölgəyə əlavə tanker təyyarələri də yerləşdirib.

Bu addım bəzi analitiklər tərəfindən mümkün geniş əməliyyatlara hazırlıq kimi dəyərləndirilir.

Eyni dövrdə "C-17" və "C-5M" tipli ağır yük təyyarələri vasitəsilə İsrail, Səudiyyə Ərəbistanı və Afrikadakı "Camp Lemonnier" bazasına təxminən 97 uçuş həyata keçirilib.

Bu uçuşlarla hərbi texnika və logistika dəstəyi daşınıb. Əvvəlki hesabatlarda da ABŞ kargo və tanker təyyarələrinin İsrailə enişləri qeyd olunub və bu, bölgədə hərbi güclənmənin davamı kimi qiymətləndirilir.

Şərqi Aralıq dənizi, Ədən körfəzi və Hörmüz boğazı üzərində "P-8A", "MQ-4C" və "RC-135W" tipli kəşfiyyat təyyarələri ilə ən azı 19 uçuş həyata keçirilib.

Bu missiyaların əsasən İran və ətraf bölgələrdəki hərbi hərəkətliliyi izləməyə yönəldiyi bildirilir.