ABŞ bu regiona qırıcılar və PUA-larını göndərdi

ABŞ Karib regionunda hərbi fəaliyyətini əhəmiyyətli dərəcədə gücləndirib. ABŞ Hərbi Hava Qüvvələri regiondakı bazalarda və gəmilərdə yeddi döyüş təyyarəsi eskadriliyini, ümumilikdə təxminən 78 təyyarəni, həmçinin böyük qruplaşma ağır hücum dronlarını yerləşdirib.

BAKU.WS xəbər verir ki, bu barədə "The War Zone" nəşri məlumat yayıb.

Dekabrın ikinci yarısında Puerto-Riko adasındakı "Roosevelt-Roads" bazasına ABŞ Hərbi Hava Qüvvələrinin beşinci nəsil "F-35A Lightning II" təyyarələrindən ibarət, təxminən 14 təyyarədən təşkil olunmuş eskadrilya gəlib.

Bu addım ABŞ-nin Cənub Komandanlığının (SOUTHCOM) hava komponentini gücləndirməyə yönəlib. Eskadrilyaya artıq sentyabr ayından bazada yerləşmiş 10 "F-35B" təyyarəsi də qoşulub. Həmçinin, bazada "AV-8B Harrier" vertikal eniş-qalxış təyyarələrindən ibarət altı təyyarəli eskadrilya da fəaliyyət göstərir.

Hazırda Karib dənizində, Venesuelanın şimalında, ABŞ Hərbi Dəniz Qüvvələrinin nüvə ilə işləyən "USS Gerald Ford" təyyarədaşıyan gəmisi patrul xidmətindədir. Gəmidə "F/A-18F Super Hornet" döyüş təyyarələrindən ibarət 48 təyyarə, dörd eskadrilya təşkil olunub. Bundan əlavə, "USS Iwo Jima" böyük desant gəmisində altı "AV-8B Harrier" təyyarəsi yerləşdirilib.

Puerto-Rikonun şimalında yerləşən "Rafael Hernandez" beynəlxalq aeroportunda isə 10 ədəd ağır uzun məsafəli "MQ-9A Reaper" kəşfiyyat-hücum dronu bazalanıb. Bu dronlar müxtəlif silah və elektron avadanlıq kombinasiyalarını daşımaq imkanına malikdir.