"Təmiz qidalanma" trendinin təhlükəsi barədə XƏBƏRDARLIQ

"Təmiz" və sağlam qidalanma prinsiplərinə uyğun məhsullara həddindən artıq aludəçilik təhlükəli obsesiyaya çevrilə bilər və nəticədə nevroloji ortoreksiya inkişaf edə bilər.

BAKU.WS xəbər verir ki, bu barədə "Medical Xpress" jurnalında məqalə dərc olunub.

Mütəxəssislər qeyd edirlər ki, qidalanmada ciddi məhdudiyyətlərə dair tövsiyələr çox vaxt peşəkar həkimlərdən deyil, sağlam həyat tərzini təşviq edən "wellness" bloqerlərdən (influencerlərdən) gəlir. Problem o zaman ciddi xarakter alır ki, insanın qida vərdişləri onun özünə qiymətini müəyyən etməyə başlayır və qaydalardan hər hansı kənara çıxma günahkarlıq və narahatlıq hissi yaradır.

Ekspertlər bu cür destruktiv davranışın əlamətləri kimi qidaların "yaxşı" və "pis" kateqoriyalarına bölünməsini, daim qida rasionunun planlaşdırılmasını və "yanlış" yeməklərin ola biləcəyi tədbirlərdən imtinanı göstərirlər.

Yaxınlarında bu cür obsesiv davranış olan insanlara kömək üçün mütəxəssislər sakit söhbət üçün uyğun vaxt seçməyi, diqqəti xarici görünüşə deyil, ümumi sağlamlığa yönəltməyi və mütləq peşəkar həkimə müraciət etməyi tövsiyə edirlər.

Həkim-psixoterapevt, Moskva vilayəti Səhiyyə Nazirliyinin Krasnoqorsk Klinik Xəstəxanasının əməkdaşı Yelena Kunakovskaya bildirib ki, insan beyni yüksək kalorili qidanı sağlamlıq mənbəyi kimi deyil, "xilas vasitəsi" kimi qəbul edir. Onun sözlərinə görə, qədim dövrlərdən acı dadlı tərəvəzlər zəhərlə əlaqələndirildiyi üçün beyin enerji axtarır, sağlamlıq deyil – şəkər və yağ isə onun üçün "super yanacaq" rolunu oynayır.

Mütəxəssis qeyd edib ki, orqanizm yüksək kalorili qida qəbulundan "məmnun qalır", lakin sadə toyuq filesi beyin üçün "aclıq dövrü" siqnalı kimi qəbul olunur.