FİFA dünya çempionatının hüquqlarının satılmasından imtina etdi

Beynəlxalq Futbol Federasiyası (FİFA) dünya çempionatının kommersiya hüquqlarının bir hissəsinin özəl investorlara satılması ilə bağlı layihədən rəsmən imtina edib.

BAKU.WS xəbər verir ki, bu barədə FİFA prezidenti Canni İnfantino qurumun rəsmi saytında yayımlanan açıqlamasında bildirib.

Onun sözlərinə görə, məsələ ilə bağlı müxtəlif tərəflərin mövqeləri diqqətlə nəzərdən keçirilib və nəticədə layihənin təşkilat daxilində ciddi fikir ayrılığı yaratdığı müəyyən edilib.

"Bütün fikirləri diqqətlə dinlədikdən sonra belə qənaətə gəldik ki, bu layihə o qədər ciddi fikir ayrılığı yaradıb ki, dəstək səviyyəsindən asılı olmayaraq, artıq qarşıya qoyulan məqsədə xidmət etmir", – deyə İnfantino vurğulayıb.

Xatırladaq ki, iyulun sonunda FİFA-nın dünya çempionatını idarə edəcək ayrıca şirkət yaratmağı və həmin şirkətin səhmlərinin 20-30 faizini özəl investorlara satmağı planlaşdırdığı barədə məlumat yayılmışdı. Potensial investorlar arasında amerikalı iş adamı Coşua Kuşnerin Thrive Eternal fondu da göstərilirdi.

Lakin təşəbbüs futbol ictimaiyyətində ciddi narazılıq doğurmuşdu. UEFA-ya üzv bütün ölkələr, o cümlədən Rusiya, layihənin qəbul ediləcəyi təqdirdə 2030-cu il dünya çempionatını boykot edə biləcəklərini bildirmişdilər. Daha sonra Asiya Futbol Konfederasiyası və KONKAKAF da bu mövqeyə dəstək vermişdi.

Qeyd edək ki, 2026-cı il dünya çempionatı ABŞ, Kanada və Meksikada keçirilib. Turnirin qalibi finalda Argentinanı əlavə vaxtda 1:0 hesabı ilə məğlub edən İspaniya millisi olub. Həmin mundial tarixdə ilk dəfə 48 komandanın iştirakı ilə təşkil edilib.