Yaşlı və tənha insanlara XƏBƏRDARLIQ

Vətəndaşlara yaxın qohumlarının xəstə olması, müalicəsinə təcili pul lazım olması ilə bağlı kütləvi zənglər edilir.

Bununla bağlı Daxili İşlər Nazirliyinin Mətbuat Xidməti xəbərdarlıq yayıb.

Qeyd olunur ki, naməlum şəxslər müxtəlif xarici, yerli nömrələrdən mobil və ev telefonlarına zənglər etməklə yaxın qohumları - övladı, bacısı, qardaşı, atası və anasının xəstəxanaların birində ağır vəziyyətdə olması ilə bağlı vətəndaşlara yalan məlumatlar verərək təcili ödəniş edilməsi üçün müxtəlif məbləğlərdə pul vəsaitləri tələb edirlər. Cinayətkar şəxslər və qruplar tərəfindən, əsasən, ahıl, tənha vətəndaşlar hədəf seçilməklə, onların yaşadıqları ünvanlara kuryerlər göndərməklə tələb olunan vəsaitlər nağd və ya onlayn formada ələ keçirilir.

Bunları nəzərə alaraq, DİN-dən diqqətə çatdırılıb ki, belə hallarla bağlı vətəndaşlar diqqətli olsunlar, daxil olan zənglər üzrə verilən məlumatları dəqiqləşdirsinlər, tanımadıqları şəxslərə pul vəsaitlərini verməsinlər.