Şəxsi məlumatlar sosial şəbəkələrdə necə "sızır"? – İstifadəçi bilmədən TƏHLÜKƏLİDİR

Sosial şəbəkələr gündəlik həyatımızın bir hissəsinə çevrilsə də, şəxsi məlumatların qorunması məsələsi hələ də ciddi müzakirə mövzusudur. Ekspertlər xəbərdarlıq edir ki, istifadəçilər bəzən bilmədən öz məlumatlarını kiberdələduzların ixtiyarına verirlər.

BAKU.WS xəbər verir ki, kibertəhlükəsizlik üzrə mütəxəssislərin sözlərinə görə, istifadəçilərin paylaşdığı selfilər, yerləşmə məlumatları, doğum tarixi, ailə üzvləri və hətta ev ünvanı kimi məlumatlar dələduzlar üçün dəyərli mənbəyə çevrilir. Bu bilgilər həm kimlik oğurluğunda, həm də fırıldaq sxemlərində istifadə oluna bilər.

Araşdırmalar göstərir ki, sosial platformaların əksəriyyətində istifadəçi razılığı ilə məlumatlar üçüncü tərəflərlə paylaşılır. Bu isə reklam məqsədindən tutmuş siyasi təhlillərə qədər geniş sahələri əhatə edir. Bir çox tətbiq isə cihazdakı kontaktlara, mikrofon və kameraya icazə tələb edir – bu da əlavə təhlükə yaradır.

Azərbaycan Kiber Təhlükəsizlik Təşkilatları da dəfələrlə xəbərdarlıq edərək, istifadəçiləri parolların mütəmadi dəyişdirilməsinə, şəxsi məlumatların minimum səviyyədə paylaşılmasına və iki mərhələli identifikasiya sistemindən istifadə edilməsinə çağırıb.

Mütəxəssislər vurğulayır ki, "görünməz risklər" fonunda internetdə ehtiyatlı davranmaq və fərdi məlumatların paylaşılmasına diqqətlə yanaşmaq artıq zərurətə çevrilib.