FHN bu ərazilərdə yeni xilasetmə məntəqələri tikdirəcək - SİYAHI

Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Dövlət Xidməti üçün yeni məntəqələrin tikintisinə başlanılır.

BAKU.WS-in məlumatına görə, layihə çərçivəsində Mingəçevir, Xaçmaz, Nabran, Niyazoba və Şimal dalğıc-axtarış qrupu üçün müvafiq obyektlərin inşası nəzərdə tutulur.

Bununla bağlı Fövqəladə Hallar Nazirliyinin Əsaslı Tikinti İdarəsi tərəfindən 800 003 manat ehtimal olunan qiymətlə işlərin satın alınması həyata keçirilir.

Layihənin ümumi məqsədi FHN-in Kiçikhəcmli Gəmilərə Nəzarət və Sularda Xilasetmə Dövlət Xidmətinin fəaliyyət imkanlarının genişləndirilməsi və müxtəlif ərazilərdə xilasetmə qrupları üçün daha əlverişli şərait yaradılmasıdır.

Yeni məntəqələrin yaradılması xüsusilə su hövzələrində baş verə biləcək hadisələrə operativ müdaxilə baxımından əhəmiyyət daşıyır. Bu obyektlərin fəaliyyəti xilasedicilərin hadisə yerlərinə daha qısa müddətdə çatmasına, texnika və avadanlıqların daha əlçatan saxlanmasına və axtarış-xilasetmə işlərinin daha çevik təşkilinə imkan verə bilər.