Ceyhun Osmanlı: "Yaşıllar nə qədər çox olsa, o qədər yaxşıdır" - VİDEO

Azərbaycan Yaşıllar Hərəkatının həmtəsisçisi Ceyhun Osmanlı İTV-də yayımlanan 3D proqramında Dadaş Dadaşlinskinin qonağı olub.

BAKU.WS xəbər verir ki, Ceyhun Osmanlı verilişdə sualları cavablandırarkən həmtəsisçisi olduğu Azərbaycan Yaşıllar Hərəkatından danışıb.

Onun sözlərinə görə, Yaşıllar Hərəkatı Azərbaycanda yaşıl ideyalı nə ilk, nə də son təşkilat deyil: "Buna qədər olub, bundan sonra da olacaq. Hesab edirəm ki, nə qədər çox olsa o qədər yaxşıdır. Bəzilərinin iddia etdiyi kimi bu partiya deyil, təkrar ideyadır. Mən Milli Məclisin deputatı olan zaman Avronest və Avropa Parlamentində fəal iştirak edirdim və hətta o zaman Yaşılların deputatlarından biri ilə Avronestdə bir qətnamə layihəmiz qəbul olunmuşdu. Yaşıllarla o zamandan müəyyən iş birliyim var idi.

Qeyd edim ki, Avropa Parlamentində Yaşıllar dördüncü ən böyük qüvvədir. Bəzən ayrı-ayri zamanlarda mən fikir verirdim ki, bir çox Yaşılların deputatı Azərbaycana tənqidi yanaşırdılar. Mən bunun səbəbi ilə maraqlananda deyirdilər ki, Yaşıllar Azərbaycanda təmsil olunmur. Mən cavab verirdim ki, Azərbaycanda kifayət qədər Yaşıl ideyalı islahatlar da, fəaliyyətlər də var".