Bakı metrosunun Yaşıl və Qırmızı xətlərinin ayrılması ilə bağlı görülən işlər açıqlanıb

"Bakı Metropoliteni" QSC-nin Yaşıl və Qırmızı xətlərinin ayrılması layihəsi çərçivəsində indiyə qədər tunelin 63 metrlik hissəsində qazma işləri icra olunub.

BAKU.WS xəbər verir ki, bunu report-a açıqlamasında səhmdar cəmiyyətinin Tikinti layihələrinin idarə olunması departamentinin rəisi Məmməd Rzayev bildirib.

O xatırladıb ki, layihə çərçivəsində ümumi uzunluğu 211 metr olan tunel qazılmalıdır: "İşlər planlı şəkildə, qrafikə uyğun olaraq davam etdirilir".

Metro rəsmisinin sözlərinə görə, Qırmızı və Yaşıl xətlərin uzadılması kompleks layihədir:

"Belə layihəni beynəlxalq maliyyə təşkilatları maliyyələşdirir və layihə bazasında artıq proseslər davam edir. Yəni tender prosesinə hazırlıq gedir. Qalibi elan olunduqdan sonra tikinti işlərinə başlanılacaq".