055 213 76 73
Azərbaycanın rayonlarından birində “Unikal” restoranında qəlyanaltı edən ərəb turistlərə 617 AZN hesab verilməsi xəbəri yayıldıqdan sonra həmin restoranda qonaq olan digər azərbaycanlı müştərilər də eyni aqibətlə üzləşdiklərini bildiriblər.
BAKU.WS-ə müraciət edən müştərilər qeyd edir ki, avqustun 6-da “Unikal” restoranında 15 nəfərlik kollektivlə qəlyanaltı ediblər və bu onlara baha başa gəlib.
“Samovar çayı, mürəbbə, pomidor-xiyar salatı, pendir, zeytun, kompot və.s. sifarişimiz oldu. Yekunda gələn hesab 398 AZN-dir.
Qaimədə yalnız sifarişin sayını qeyd edirlər, qiymət isə yazılmır, menyu da yoxdur. uzun söhbətdən sonra 160 AZN-də razılaşdıq”, - deyə zərərçəkənlər bildirib.
Onların sözlərinə görə, qiymətlər birbaşa restoranın müdiri tərəfindən yazılır.
Xatırladaq ki, ötən gün yayılan xəbərə görə, 10-u böyük, 5-i uşaq olmaqla 15 nəfərlik ərəb turistdən ibarət qrupa Qəbələyə tur təşkil edilib. Yolda turistlər "Unikal" restoranında qəlyanaltı etmək qərarı verib. Ərəb turistlərə bu qəlyanaltı 617 manata başa gəlib:
"Bələdçi əvvəlcə ofisiantlardan menyu soruşub və cavabında menyu olmadığını bildiriblər. Sonra kabab porsiyasının qiymətini soruşdular. Cavab verdilər ki, bir porsiya 11 manatdır. Ərəblər yemək sifariş verib və daha sonra hesab istəyib. 617 manatlıq hesab gəlib. Qiymətlər qəbzdə göstərilmişdi. Turistlərin qiymətə narazılığına restoranın sahibi belə cavab verib: "Mən ölkədə ən gənc generalam və heç kəs mənə heç nə deyə bilməz". Sonra təhqiramiz sözlərlə ərəbləri söyməyə başladı. Bələdçi qızın bu sözlər qarşısında ağlamağa başlamasından sonra turistlər hesabı ödəmək məcburiyyətində qalıb. Restoran sahibinin sözlərinə görə, İsmayıllı rayonunun polisinə müraciət etmək mənasızdır", - deyə şirkətdən BAKU.WS-ə bildirilib.
Həmçinin turizm şirkətindən qeyd etdilər ki, ərəblər praktik olaraq eyni sifariş üçün Qəbələdə restoranda cəmi 220 manat ödəyib.
BAKU.WS