20 Yanvar hadisələrindən bəhs edən "Kapitan və Xəzər dənizi" filminin premyerası keçirilib

Nizami Kino Mərkəzində "Kapitan və Xəzər dənizi" adlı qısametrajlı tarixi-sənədli animasiya filminin premyerası keçirilib. Animasiya və arxiv materiallarının hibrid işlənməsi əsasında ərsəyə gələn film 1990-cı il 20 yanvar gecəsi baş verən ümumxalq faciəsinə həsr olunub.

Baku TV-nin məlumatına görə, filmin istehsalçısı "Rental Azərbaycan" MMC, rejissoru və ssenari müəllifi Türkan Hüseyn, prodüseri isə Emil Nəcəfovdur.

Prodüser Emil Nəcəfovun sözlərinə görə, filmin ərsəyə gəlməsində Azərbaycan Respublikasının Kino Agentliyi, İctimai Televiziya və Azərbaycan Kinematoqrafçılar İttifaqı dəstək göstərib.

"Əsas məqsədimiz Azərbaycanın müstəqilliyi uğrunda canından keçmiş, özünü fəda etmiş insanların həyat yolunu gələcək nəsillərə çatdırmaq və bu müstəqilliyin hansı çətinliklər bahasına əldə olunduğunu göstərməkdir. Ümid edirəm ki, buna nail olmuşuq", - prodüser bildirib.