Amina Yahoviç Mustafa Sandalı məhkəməyə verib

Amina Yahoviç 7 il əvvəl boşandığı yoldaşı, tanınmış müğənni Mustafa Sandala qarşı məhkəmə iddiası qaldırıb.

BAKU.WS xəbər verir ki, cütlük 2018-ci ildə qarşılıqlı razılaşma ilə boşanıb.

Boşanma protokoluna əsasən övladların qəyyumluğu Yahoviçə verilib. Həmçinin, tərəflərin Beykozda yerləşən evinin satılacağı və satışdan əldə edilən vəsaitdən 2 milyon dolların Amina Yahoviçə, 500 min dolların isə uşaqların təhsil xərclərinə yönəldiləcəyi qeyd edilib. Protokola əsasən Mustafa Sandal keçmiş həyat yoldaşına Serbiyadan mənzil almalı, aliment ödəməli və Yahoviçlə övladları üçün lazım gəldiyi hallarda avtomobil icarəyə götürülməsini təmin etməli idi.

Amina Yahoviç protokoldakı öhdəliklərin tam yerinə yetirilmədiyini əsas gətirərək İstanbul Ailə Məhkəməsinə müraciət edib. O, aliment ödənişlərinin gecikdirildiyini və avtomobil icarə öhdəliyinin icra olunmadığını bildirib.

Şikayətdən sonra proses başlayıb. Məhkəmənin yaxın günlərdə tərəflərin iddialarını araşdıraraq qərar verməsi gözlənilir.