Qarabağın qarlı dağlarına ekspedisiya təşkil ediləcək

"Azərbaycan Ekologiya və Təbii Sərvətlər Nazirliyi ölkənin yüksək dağlıq ərazilərində qar ehtiyatlarını qiymətləndirmək üçün ekspedisiyalar keçirməyi planlaşdırır".

BAKU.WS xəbər verir ki, bu sözləri "1news.az"a açıqlamasında Milli Hidrometeorologiya Departamentinin baş hidroloqu Asif Verdiyev bildirib.

Onun sözlərinə görə, yaz və yay dövründə çayların yüksək axınının yaranmasında qarlı qışın əhəmiyyətini qiymətləndirmək çətindir.

“Suyun rasional istifadəsini planlaşdırmaq və 2021-ci ilin aprelindən iyun ayınadək olan dövrdə Azərbaycan çaylarında suyun mövcudluğunun proqnozunu hazırlamaq üçün martın ilk ongünlüyündə hidroloqlar 16 dağ marşrutu boyunca ekspedisiyaya gedəcəklər".

Nazirlik rəsmisi əlavə edib ki, Naxçıvan Muxtar Respublikasında da qar tədqiqatları təşkil ediləcək: "Xüsusi olaraq qeyd etmək istərdim ki, bu il - 30 illik fasilədən sonra ilk dəfə mütəxəssislərimizlə Qarabağa ekspedisiyaya gediləcək. Tərtər və Həkəri çayları hövzəsində tədqiqat aparılması planlaşdırılır”.