Ərəb şeyxləri barışmaq qərarına gəliblər

Qətər və Səudiyyə Ərəbistanı arasında dayandırılan bütün əlaqələr yenidən bərpa oluna bilər.

BAKU.WS xəbər verir ki, bu barədə "Wall Street Journal" yazıb.

Nəşrin yazdığına görə, Qətər xarici işlər naziri Məhəmməd bin Əbdürrəhman əl-Sani ötən ay Səudiyyə Ərəbistanına sürpriz səfər reallaşdırıb. Əl-Sani iki ölkə arasındakı gərginliyi azaltmaq üçün Qətərin "Müsəlman Qardaşlar"la əlaqələri kəsməyə hazır olmasını ər-Riyadın diqqətinə çatdırıb.

Qeyd edək ki, ərəblərin iki ən varlı ölkəsinin münasibətləri 2 ilən çoxdur pozulub. Buna səbəb isə rəsmi Dohanın Səudiyyənin istəklərini yerinə yetirməkdən imtina etməsi olub. Səudiyyə Ərəbistanı, BƏƏ, Yəmən, Misir və Bəhreyn 5 iyun 2017-ci il tarixində Qətərlə bütün diplomatik münasibətləri kəsiblər.

Qətərə tətbiq olunan embarqonun ləğvi üçün "Müsəlman Qardaşlar" və bir neçə qruplaşmaya maliyyə dəstəyinin dayandırılması, "Əl-Cəzirə" televiziyasının bağlanılması və İranla bütün əlaqələrin kəsilməsindən ibarət 13 şərt irəli sürülüb.