Bolqarıstan Azərbaycan, Gürcüstan və Türkiyə ilə enerji memorandumunun imzalanmasına razılıq verib

Bolqarıstan Azərbaycan, Gürcüstan və Türkiyə ilə "yaşıl enerji" sahəsində əməkdaşlığa dair Memorandum layihəsini təsdiqləyib

"Report" xəbər verir ki, bu barədə Bolqarıstan Teleqraf Agentliyi Nazirlər Şurasının həftəlik iclasının yekunlarına dair bəyanatına istinadən məlumat yayıb.

Söhbət Bolqarıstan, Azərbaycan, Gürcüstan və Türkiyənin enerji nazirləri tərəfindən imzalanacaq və "yaşıl elektrik enerjisi"nin ötürülməsi və ticarəti sahəsində əməkdaşlığı nəzərdə tutan memorandumdan gedir. Sənəd üç il müddətinə qüvvədə olacaq və tərəflərdən heç biri onun ləğvini təşəbbüs etməzsə, növbəti üçillik dövrlər üçün avtomatik uzadılacaq.

Bəyanatda qeyd olunub ki, memorandum tərəflərin "yaşıl elektrik enerjisi" sahəsində birgə layihələrin təşviqi, zəruri infrastrukturun yaradılması, bilik və texnologiyaların mübadiləsi, eləcə də qarşılıqlı faydalı təşəbbüslərin dəstəklənməsi barədə razılığını əks etdirir.

Sənədə əsasən, dörd ölkənin energetika nazirlikləri dövlət və özəl sektorlar arasında əməkdaşlığın gücləndirilməsinə dəstək verəcək. Bu çərçivədə enerji sistemlərinin modernləşdirilməsi imkanlarının öyrənilməsi, elektrik enerjisinin ötürülməsi və ticarət imkanlarının genişləndirilməsi üçün birgə investisiya layihələrinin həyata keçirilməsi nəzərdə tutulur. Həmçinin memorandum enerji infrastrukturunun təkmilləşdirilməsi və bərpa olunan enerji mənbələrindən istifadənin stimullaşdırılmasına yönəlmiş tədbirləri də əhatə edir.

Qeyd edək ki, "yaşıl enerji" sahəsində əməkdaşlığa dair Memorandum layihəsi 2025-ci il fevralın 7-də İstanbulda keçirilən dörd ölkənin nazir müavinlərinin üçüncü iclasında razılaşdırılıb.