Qadın öz ərinin cibindən icazəsiz pul götürə bilərmi?

Əgər ailədə pul qazanan yalnız kişidirsə, qadın icazəsiz onun pulundan götürə bilməz. Bu, düzgün hərəkət deyil və halal sayılmır.

Ailə hər şeydən əvvəl qarşılıqlı anlaşma, düzgünlük, səmimiyyət üzərində qurulmalıdır. Ailə üzvlərinin bir-birinin mülkünə icazəsiz müdaxilə etmələri yanlış hərəkətdir. Əlbəttə, bütün bunlar kişinin puldan götürməyə razı olmadığı hala aiddir.

Əgər qadın bilsə ki, onun puldan götürməsinə kişi etiraz etmir, kişi bunu hər hansı vasitə ilə qadına bildirmişsə, o halda bu addım icazəli sayılır; amma bu zaman da qadın xəbərdarlıq etməli və pulu götürdüyü barədə kişiyə məlumat verməlidir.

BAKU.WS “islam.az”a istinadən xəbər verir ki, hər şeydən əvvəl, bu, ailənin xeyrinə olan bir məsələdir. Çünki əksər ailələrdə pulu xərcləyən, alış-veriş edən kişidir və o, öz cibindəki pulun miqdarını bilməlidir ki, lazım olan vaxt həmin məbləği xərcləmək istəyərkən pis duruma düşməsin.

Əlbəttə, kişi də öz üstünlüyündən sui-istifadə etməməli, qadının bütün zəruri xərclərini qarşılamalıdır. Bu işlər səmimiyyət və qarşılıqlı anlaşma, ədalət müstəvisində tənzimlənməlidir.