Qızılın qiyməti QALXDI

18 fevral 2026-cı il tarixinə olan məlumata görə, qlobal bazarlarda yaşanan kəskin enişdən sonra qızıl qiymətlərində qismən bərpa müşahidə olunur.

BAKU.WS xəbər verir ki, ötən ticarət sessiyasında ABŞ ilə İran arasında danışıqlarda irəliləyiş xəbərlərinin yayılması fonunda qızılın unsiya qiyməti 2%-dən çox ucuzlaşmışdı. Lakin çərşənbə günü etibarilə beynəlxalq bazarlarda yenidən artım tendensiyası qeydə alınıb.

Qızılın qiyməti təxminən 1% yüksələrək bir unsiya üçün 4 925 dollara çatıb.

Analitiklərin fikrincə, bazarlarda dalğalanma əsasən ABŞ Mərkəzi Bankının Federal Reserve, faiz siyasəti ilə bağlı gözləntilərdən qaynaqlanır. İnvestorlar qurumun açıqlayacağı protokolları və mümkün faiz qərarlarını diqqətlə izləyirlər. Faiz dərəcələrinin istiqaməti qızılın cəlbediciliyinə birbaşa təsir göstərir.

Bununla yanaşı, dollar indeksinin möhkəmlənməsi və davam edən geosiyasi risklər də qiymət formalaşmasına təsir edən əsas amillər sırasındadır. Qızıl ənənəvi olaraq qeyri-müəyyənlik dövründə "təhlükəsiz liman" aləti kimi qiymətləndirilir.

Digər qiymətli metallarda isə fərqli dinamika müşahidə olunur. Gümüş ucuzlaşma tendensiyasını davam etdirir, platin və palladiumda isə məhdud artım qeydə alınıb.

Mütəxəssislər bildirirlər ki, yaxın günlərdə bazarların istiqaməti əsasən ABŞ-dən gələcək iqtisadi siqnallardan və geosiyasi proseslərin inkişafından asılı olacaq.