Dollarla bağlı gərgin vəziyyət: sabah bahalaşacaq

Azərbaycan Dövlət Neft Fondunun (ARDNF) bu gün valyuta hərracında 23 kommersiya bankına satdığı 100 mln. ABŞ dollarına qarşı faktiki tələbat 200 mln. dollardan çox olub.

BAKU.WS-in Report-a istinadla verdiyi məlumata görə, bankların dollara olan tələbatının bu dərəcədə yüksək olması nəticəsində bugünkü hərracda məzənnə 1,5843 AZN/USD-yə yüksəlib. Qeyd edək ki, hərracda formalaşan məzənnə bu günə olan məzənnədən 0,5% artıqdır. Bu da AMB-nin son zamanlar +0,2%-li gündəlik məzənnə dəyişməsi siyasətindən imtina edərək marjanı 0,5%-ə artırması deməkdir. Maraqlıdır ki, bugünkü hərracda banklar təkliflərini maksimal məzənnə ilə irəli sürüblər.

Xatırladaq ki, martın 2-nə rəsmi məzənnə 1,5764 AZN/USD səviyyəsində müəyyənləşdirilib.

"Report"un analitik qrupu AMB-nin manatın məzənnəsini zəiflətməsi hazırkı iqtisadi konyunkturda anlaşılan deyil: "Neftin qiymətinin artması və qonşu ölkələrin valyutaları, xüsusilə də rublun möhkəmlənməsi fonunda manatın məzənnəsinin azaldılmasının səbəbi aydın deyil. Bugünkü hərracın nəticələri sabah rəsmi məzənnənin 1,5843 AZN/USD-yə kimi yüksələcəyini göstərir".

"Report"un monitorinq qrupu kommersiya banklarında nağd dolların satış məzənnəsinin artıq 1,60 AZN/USD həddini üstələdiyini bildirir.

BAKU.WS