Zelenski Trampı seçkilərdəki qələbəsi münasibətilə təbrik edib

Vladimir Zelenski Donald Trampı ABŞ prezident seçkilərində qələbəsi münasibətilə təbrik edib.

BAKU.WS xəbər verir ki, o, bu barədə X sosial şəbəkəsində yazıb.

Zelenski bildirib ki, Ukrayna güclü Amerika dövrünü səbirsizliklə gözləyir.

"Mən prezident Trampın dünya məsələlərinə "Sülh yolu ilə güclənmə" yanaşmasına sadiqliyini yüksək qiymətləndirirəm. Məhz bu prinsip praktikada Ukraynada ədalətli sülhü yaxınlaşdıra bilər. Ümid edirəm ki, biz birlikdə bunu həyata keçirəcəyik", - deyə Zelenski yazıb.

O, Ukraynanın ABŞ-la qarşılıqlı faydalı siyasi və iqtisadi əməkdaşlığı inkişaf etdirməkdə maraqlı olduğunu vurğulayıb. Zelenski Ukraynanı "Avropanın ən güclü hərbi güclərindən biri" adlandırıb və Kiyevin Avropa və transatlantik ictimaiyyət üçün uzunmüddətli sülh və təhlükəsizliyi təmin etməyə çalışdığını vurğulayıb.

Sonda o qeyd edib ki, Trampı qələbəsi münasibətilə şəxsən təbrik etmək fürsətini səbirsizliklə gözləyir.

Xatırladaq ki, Tramp daha əvvəl prezident seçkilərində qalib gəldiyini elan edib və artıq Fransa, İsrail, Serbiya, Macarıstan və digər ölkələrin liderlərindən təbriklər alıb. Fox News hesab edir ki, Trampın 277 seçici səsi var. Bu, onun qələbəsini təmin edir (bunun üçün 270 səs lazımdır). Fox News-un məlumatına görə, Trampın rəqibi demokrat Kamala Harris 226 səs toplayıb.