Tramp: "Üçüncü dünya ölkələrindən miqrasiyanı daimi olaraq dayandıracağam"

ABŞ prezidenti Donald Tramp üçüncü dünya ölkələrindən ABŞ-yə miqrasiyanın tam dayandırılması barədə qərar qəbul edib.

BAKU.WS xəbər verir ki, bu barədə o, "Truth Social" sosial şəbəkəsində yazıb.

"ABŞ sisteminin tam bərpa olunmasına imkan vermək üçün bütün üçüncü dünya ölkələrindən miqrasiyanı daimi pauzaya alacağam. Ölkəmizin vətəndaşı olmayan şəxslərə verilən bütün federal imtiyaz və subsidiyaları dayandıracağam",-deyə Tramp bildirib.

Bununla yanaşı, ABŞ lideri ölkə üçün "ictimai yük", "təhlükəsizlik təhdidi" yaradan və ya "Qərb sivilizasiyasına uyğun olmayan" hər bir xarici vətəndaşın deportasiya ediləcəyini vurğulayıb.

Qeyd edək ki, 26 noyabrda Vaşinqtonda, Ağ Evdən bir neçə kvartal aralıda atışma baş verib və iki Milli Qvardiya əməkdaşı yaralanıb. Hadisədən sonra Tramp bəyan edib ki, şübhəli şəxs Əfqanıstandan gəlib və həmin ölkəni "yer üzündəki cəhənnəm çuxuru" adlandırıb. O, həmçinin iddia edib ki, silahlı şəxsi ABŞ-yə gətirən onun sələfi Co Baydenin administrasiyasıdır.

Hadisədən bir gün sonra ABŞ hakimiyyəti Əfqanıstan vətəndaşlarının bütün immiqrasiya müraciətlərinin baxılmasını müvəqqəti dayandırıb.