Tramp: Mən olmasaydım, İsrail məhv edilmişdi

ABŞ Prezidenti Donald Tramp İsrailə verdiyi dəstəyin ölkənin təhlükəsizliyi baxımından həlledici rol oynadığını bildirib.

BAKU.WS xəbər verir ki, Tramp bu fikirləri Axios portalına müsahibəsində səsləndirib.

O, İsrailin Baş naziri Benyamin Netanyahu ilə münasibətlərinə toxunaraq bildirib ki, İsrail bu gün sahib olduğu silah və hərbi imkanlara malikdirsə, bunda ABŞ-ın dəstəyi mühüm rol oynayıb.

"Donald Tramp olmasaydı, İsrail yer üzündən silinmişdi", – deyə ABŞ prezidenti vurğulayıb.

Tramp Netanyahu ilə münasibətlərinin yaxşı olduğunu desə də, əlavə edib ki, "onları bir qədər daha məqbul səviyyədə saxlamaq lazımdır".

ABŞ lideri, həmçinin İsraili Livana qarşı yeni hərbi əməliyyatlardan çəkindirə biləcəyinə inandığını bildirib. Onun sözlərinə görə, İsrail rəhbərliyi ona hörmət edir və tövsiyələrini nəzərə alır.