Titaniki batıran təbiət hadisəsi İngiltərə sahillərində müşahidə edilib

İngiltərənin Kornuoll sahillərində istirahət edən insanlar qeyri-adi atmosfer hadisəsinin şahidi olublar. Dəniz üzərində yaranan və sürətlə forma dəyişən nəhəng optik illüziya həm turistlərin, həm də mütəxəssislərin diqqətini cəlb edib.

BAKU.WS xarici mətbuata istinadən xəbər verir ki, söhbət nadir rast gəlinən "Fata Morqana" təbiət hadisəsindən gedir.

Hadisəni müşahidə edənlərin sözlərinə görə, üfüqdə peyda olan görüntü təxminən 30 mərtəbəli bina hündürlüyündə təsir bağışlayıb. O davamlı olaraq dəyişdiyi üçün insanlar onun formasını fərqli cür qavrayıblar. Bəziləri ağ ayını xatırladan siluet gördüklərini bildiriblər, digərləri isə havada asılı qalmış yelkənli gəmi, tikinti qülləsi və ya nəhəng yazıya bənzər fiqurlar seçiblər.

Meteoroloqlar izah edirlər ki, bu fenomen temperatur inversiyası nəticəsində meydana gəlir. Belə vəziyyətdə isti hava təbəqəsi soyuq hava qatının üzərində yerləşir və atmosferdə işıq şüalarını qeyri-adi şəkildə əyən xüsusi "optik kanal" formalaşır. Nəticədə uzaqda yerləşən obyektlər olduğundan daha yaxın görünə, yaxud havada süzürmüş kimi təsir bağışlaya bilər.

Mütəxəssislər qeyd edirlər ki, məhz bu cür atmosfer şəraitinin 1912-ci ildə baş vermiş məşhur "Titanik" faciəsində də müəyyən rol oynamış ola biləcəyi ehtimal edilir. Britaniyalı tarixçi Tim Maltinin irəli sürdüyü nəzəriyyəyə əsasən, həmin gecə yaranmış temperatur inversiyası üfüq xəttini təhrif edib. Bu səbəbdən müşahidəçilər qarşıdakı aysberqi vaxtında seçə bilməyib və gəmi ilə toqquşmanın qarşısını almaq mümkün olmayıb.

Kornuoll sahillərində buna bənzər hadisələr əvvəllər də qeydə alınıb. Sosial şəbəkələrdə yayılan fotolarda yük gəmilərinin və sahil tikililərinin sanki dənizin üzərində uçduğu görünür. Alimlər belə mənzərələrin vizual baxımdan heyranedici olsa da, dənizçilər üçün müəyyən risklər yaratdığını vurğulayırlar. Xüsusilə zəif görünmə şəraitində bu cür optik illüziyalar istiqamət hissini poza və təhlükəli vəziyyətlərə səbəb ola bilər.