Peskovdan Zelenskiyə cavab: Rusiya ukraynalıları Ankarada yox, İstanbulda gözləyir

Rusiya nümayəndə heyəti Ukrayna tərəfini Ankarada deyil, İstanbulda gözləyir.

Bu barədə Kremlin mətbuat katibi Dmitri Peskov jurnalistlərin sualını cavablandırarkən bildirib.

O, Volodimir Zelenskinin Ankarada Türkiyə prezidenti Rəcəb Tayyib Ərdoğanla görüşdən sonra danışıqlarda iştirak edib-etməmək barədə qərar verəcəyinə dair xəbərlərə münasibət bildirib.

"Bunu heç cür şərh edə bilmərəm. Nümayəndə heyətimiz İstanbulda gözləyir, Ankarada yox," – deyə Peskov qeyd edib.

"Sky News" nəşri adının açıqlanmasını istəməyən ukraynalı rəsmiyə istinadla yazıb ki, Ukrayna prezidenti Rusiya ilə danışıqlarda iştirak edib-etməməyə dair qərarını Ərdoğanla görüşdən sonra verəcək.