Mask ABŞ hökuməti üçün süni intellektlə işləyən chat-bot hazırlayır

İlon Maskın rəhbərlik etdiyi ABŞ hökumətinin səmərəliliyinin artırılması departamenti (Department of Government Efficiency, DOGE) süni intellekt (Sİ) əsaslı "GSAi" adlı çat-botun hazırlanması üzərində işləyir.

BAKU.WS xəbər verir, bu barədə "Wired jurnalı" məlumat yayıb.

Məlumata görə, qurum qısa müddətdə dövlət idarəçiliyində istifadə olunacaq çat-botu hazırlamağa çalışır.

Jurnalın iki anonim mənbəsinin sözlərinə görə, bu təşəbbüsün əsas məqsədi təxminən 12 min hökumət əməkdaşının gündəlik məhsuldarlığını artırmaqdır. Həmin əməkdaşlar dövlət qurumlarının ofis sahələrinin idarə edilməsi, müqavilələr və İT infrastrukturunun tənzimlənməsi ilə məşğul olurlar.

Mənbələr qeyd ediblər ki, Maskın komandası böyük həcmli məlumatları təhlil edə bilən texnologiyalardan istifadə etməyə çalışır.