KXDR Yapon dənizinə ballistik raketlər buraxıb

Şimali Koreya Yapon dənizi istiqamətində bir neçə qısa mənzilli ballistik raket atıb.

BAKU.WS xarici KİV-ə istinadən xəbər verir ki, Cənubi Koreyanın Birləşmiş Qərargah Rəisləri Komitəsinin məlumatına görə, buraxılışlar şənbə günü yerli vaxtla saat 05:20-də Vonsan bölgəsindən həyata keçirilib.

Raketlər təxminən 250 kilometr məsafə qət etdikdən sonra dənizə düşüb.

Cənubi Koreya və ABŞ hərbçiləri raketlərin texniki göstəricilərini araşdırırlar. İlkin ehtimallara əsasən, buraxılışlar "Hvason-11" seriyalı ballistik raketləri və 600 millimetrlik reaktiv yaylım atəşi sistemlərinin mərmilərini əhatə edib.

Hadisə Cənubi Koreya, ABŞ və Yaponiyanın birgə hərbi təlimlərinin başa çatmasından cəmi bir gün sonra baş verib.