İran Aİ ölkələrinin Tehrandakı səfirlərini XİN-ə çağırıb

İran Avropa İttifaqının (Aİ) İnqilab Keşikçiləri Korpusunu terror təşkilatı kimi tanıması qərarına etiraz olaraq, Aİ-yə üzv ölkələrin Tehrandakı səfirlərini Xarici İşlər Nazirliyinə çağırıb.

BAKU.WS İran mətbuatına istinadən xəbər verir ki, səfirlər bazar və bazar ertəsi günləri XİN-ə dəvət olunub. Görüşlər zamanı Aİ-nin qərarı rəsmi şəkildə pislənib. İran tərəfi bu addımın beynəlxalq hüquqa və BMT Nizamnaməsinə zidd olduğunu, həmçinin İran xalqına qarşı hörmətsizlik kimi qiymətləndirildiyini bildirib.

İranlı rəsmilər İnqilab Keşikçiləri Korpusunun ölkənin milli təhlükəsizliyinin təminində mühüm rol oynadığını vurğulayaraq, Aİ-nin qərarının beynəlxalq sülhə və hüququn aliliyinə zərbə olduğunu qeyd ediblər.

Xatırladaq ki, Avropa İttifaqı İnqilab Keşikçiləri Korpusunu terror təşkilatları siyahısına daxil etdiyini açıqlayıb. Aİ-nin Xarici Əlaqələr və Təhlükəsizlik Siyasəti üzrə ali nümayəndəsi Kaya Kallas sosial şəbəkədə paylaşdığı açıqlamada İranda baş verən repressiyaların cəzasız qalmayacağını bildirərək, bu qərarın AB xarici işlər nazirləri tərəfindən qəbul edildiyini qeyd edib.