Hüceyrələrin erkən qocalması 55 yaşadək xərçəng riskini 15%-dək artıra bilər

Yeni beynəlxalq araşdırmaya görə, 55 yaşdan aşağı insanlarda son illərdə artan xərçəng hallarının səbəblərindən biri hüceyrələrin təqvim yaşından daha sürətli qocalması ola bilər.

BAKU.WS xəbər verir ki, Vaşinqton Universiteti Tibb Fakültəsinin rəhbərliyi ilə aparılan araşdırmada ABŞ və Böyük Britaniyadan 160 mindən çox insanın genetik, bioloji və həyat tərzi ilə bağlı məlumatları təhlil edilib.

Araşdırma zamanı son nəsillərdə doğulan insanların eyni təqvim yaşında əvvəlki nəsillərlə müqayisədə hüceyrə və orqan səviyyəsində daha yaşlı bioloji profilə sahib olduğu müəyyənləşdirilib. Bioloji yaşı xronoloji yaşından daha sürətlə irəliləyən şəxslərdə gənc yaşlarda xərçəng riskinin 15%-dək yüksəldiyi müəyyən olunub.

Tədqiqatçılar sürətlənmiş bioloji qocalmanın xüsusilə ağciyər, uşaqlıq yolu və mədə-bağırsaq sistemi xərçəngləri ilə əlaqəli olduğunu bildiriblər.

Onların fikrincə, orqanizmdə müxtəlif sistemlərin fərqli sürətlə qocalması ayrı-ayrı şiş növlərinin yaranmasına təsir göstərə bilər. Belə ki, immun sisteminin erkən qocalması erkən mərhələdə ağciyər xərçəngi riskini artırarkən, piy toxumasının sürətli qocalmasının yoğun bağırsaq xərçəngi ilə əlaqəli olduğu müşahidə edilib.

Araşdırmaya rəhbərlik edən doktor Yin Cao bildirib ki, müasir ətraf mühit və həyat tərzinin orqanizmdə yaratdığı hüceyrəvi dəyişikliklər xərçəngə meyilliliyi artıra bilər.

Onun sözlərinə görə, gələcəkdə bioloji yaşın ölçülməsi yüksək risk qrupunda olan gənclərin hələ sağlam olduqları dövrdə müəyyən edilməsinə, bununla da müayinə və profilaktik tədbirlərin daha erkən yaşlarda başlanmasına imkan verə bilər.