HƏMAS Qəzzada ağır silahları təhvil verməyə razılıq verib

"Qəzza zolağındakı münaqişə tərəfləri və vasitəçilər Fələstin HƏMAS hərəkatı ilə razılaşdırılmış şəkildə silahsızlaşdırılması barədə anlaşmaya gəliblər".

BAKU.WS xəbər verir ki, bu barədə "əl-Ərəbiyyə" telekanalı məlumat yayıb.

"HƏMAS-dan ağır silahların mərhələli şəkildə təhvil verilməsi ilə bağlı ilkin razılaşmalar əldə edilib",-deyə məlumatda qeyd olunur.

Məlumata görə, Fələstin təşkilatı ABŞ tərəfinə sülh prosesinin bir hissəsi olaraq Qəzza zolağının idarə olunmasından imtina etməyə hazır olduğunu təsdiqləyib.

Yüksək vəzifəli bir HƏMAS rəsmisi "əl-Ərəbiyyə" telekanalına bildirib ki, Fələstin hərəkatı Qəzza zolağını idarə etməyə davam etmək istəmir və artıq növbəti mərhələdə ərazini idarə edəcək texnokrat komitəsinin yaradılmasına razılıq verib.

O qeyd edib ki, HƏMAS texnokrat qurum üçün təklif olunan bütün adları təsdiqləyib və siyahı ilə bağlı daxildə razılıq mövcuddur: "Danışıqlarda irəliləyişə baxmayaraq, İsrail razılaşdırılmış addımların yerinə yetirilməsinin praktik tərəflərini əngəlləyir".