Çin gəmiləri Yapon sularına daxil oldu

Çin gəmiləri Yapon sularına daxil oldu.

BAKU.WS xarici KİV-ə istinadən xəbər verir ki, Çinə məxsus 4 sahil mühafizə gəmisi Şərqi Çin dənizində mübahisəli Senkaku adalarının ətrafında Yaponiyanın milli sularını pozub. Yaponiyanın Okinava prefekturasındakı 11-ci Bölgə Sahil Mühafizə qərargahının məlumatına görə, gəmilər Minami-Kojima adaları ətrafında müşahidə olunub və Yapon sahil mühafizəsinin xəbərdarlıqlarından sonra ərazidən uzaqlaşıb.

Hadisə 2025-ci ildə Çin gəmilərinin Yapon sularını ilk dəfə pozması kimi qeydə alınıb. Daha əvvəl oxşar hadisə 6 dekabr 2024-cü ildə baş vermişdi.

Qeyd edək ki, Yaponiyanın "Senkaku", Çinin isə "Diaoyu" adlandırdığı bu adalar uzun illərdir iki ölkə arasında ərazi mübahisəsinə səbəb olur. Adalar Şərqi Çin dənizində yerləşir, əhalisizdir və 5 ada ilə 3 qayalıqdan ibarətdir.