Çin ABŞ-nin B-21 bombardmançılarının sirlərini öyrənib

Çinin aerodinamika sahəsində tədqiqat və inkişaf mərkəzinin mütəxəssisləri ABŞ Hərbi Hava Qüvvələrinin (HHQ) ən yeni strateji bombardmançı təyyarəsi olan "B-21 Raider"in konstruktiv xüsusiyyətlərini müəyyən ediblər.

BAKU.WS "19FortyFive" nəşrinə istinadən xəbər verir ki, təyyarənin sirləri yeni proqram təminatının köməyi ilə üzə çıxarılıb.

Məlumata görə, "PADJ-X" adlı platforma "B-21" haqqında açıq mənbələrdə mövcud olan məlumatlara əsaslanaraq konstruk­siyanın aerodinamik məhdudiyyətlərini müəyyən etməyə imkan verir.

Bu proqram təminatı aerodinamik göstəriciləri, mühərrik qurğusunun davranışını, eləcə də təyyarənin radiolokasiya və infraqırmızı imzalarını modelləşdirə bilir. Alimlər ABŞ bombardmançısını 288 tənzimlənə bilən parametr əsasında araşdırıblar.

Məqalədə qeyd olunur ki, "PADJ-X" öz yaradıcısının iddia etdiyi qədər effektiv olarsa, onun əsas təsiri xarici hərbi sistemlərin zəif cəhətlərinin aşkarlanmasından daha çox, Çində yeni aviasiya texnikasının hazırlanmasına yönələcək.