Buzlaqların əriməsi sürətlənib - Dəniz səviyyəsi artıb

Dünya üzrə buzlaqların əriməsi 2025-ci ildə rekord səviyyələrdən birinə çatıb. Məlumata görə, ötən il buzlaqlar ümumilikdə 408 giqaton həcmində əriyib. Bu proses nəticəsində qlobal dəniz səviyyəsi təxminən 1,1 millimetr yüksəlib.

BAKU.WS xəbər verir ki, Araşdırma Monash Universitetinin iştirakı ilə aparılıb və nəticələr "Nature Reviews Earth & Environment" nəşrində dərc olunub.

Tədqiqat göstərir ki, 2025-ci il 1975-ci ildən bəri buzlaq itkilərinə görə ən ağır altıncı il olub.

Mütəxəssislər bildirir ki, son illərdə buzlaqların əriməsi sürətlənib. Son on ildə itkilər XX əsrin sonları ilə müqayisədə təxminən dörd dəfə artıb. 1975-ci ildən bu günə qədər isə ümumilikdə 9 600 giqaton buzlaq əriməsi qeydə alınıb və bu da dəniz səviyyəsinin 26 millimetr qalxmasına səbəb olub.

Tədqiqat müəlliflərindən olan Levan Tielidze qeyd edib ki, qlobal istiləşmənin qarşısının alınması buzlaq itkilərinin və onun nəticələrinin azaldılması üçün həlledici əhəmiyyət daşıyır.