ABŞ və Səudiyyə Ərəbistanı İraqda İranın dəstəklədiyi qruplara zərbələr endirib

ABŞ ordusu Səudiyyə Ərəbistanı ilə birgə İraqda İranın dəstəklədiyi silahlı qruplara məxsus hədəflərə hava zərbələri endirib.

BAKU.WS xəbər verir ki, bu barədə ABŞ Mərkəzi Komandanlığı (CENTCOM) məlumat yayıb.

Məlumata görə, əməliyyat zamanı İraqın şərqində yerləşən silahlı qruplara aid logistika mərkəzləri və silah anbarları hədəfə alınıb.

CENTCOM bildirib ki, zərbələr son 72 saat ərzində İran İslam İnqilabı Keşikçiləri Korpusu tərəfindən ABŞ qüvvələri və Səudiyyə Ərəbistanının enerji infrastrukturuna qarşı təşkil edildiyi iddia olunan 30-dan çox pilotsuz uçuş aparatı hücumuna cavab olaraq həyata keçirilib.

Açıqlamada qeyd olunub ki, ABŞ hərbi qüvvələrinə qarşı yönəlmiş hücumlar nəticəsiz qalıb. Vaşinqton həmçinin İran İslam İnqilabı Keşikçiləri Korpusunu və onun dəstəklədiyi qrupları hücumları dayandırmağa çağırıb, əks halda yeni hərbi əməliyyatların mümkün olacağı barədə xəbərdarlıq edib.