ABŞ COVID peyvəndlərinə "gənc kişilərdə ürək zədəsi" xəbərdarlığı əlavə edəcək

ABŞ Qida və Dərman İdarəsi (FDA), Pfizer və Moderna şirkətlərindən mRNA əsaslı COVID-19 peyvəndlərinin xəbərdarlıq etiketlərini yeniləmələrini tələb edib. Yeni xəbərdarlıqda xüsusilə 16-25 yaş arası kişilərdə miokardit (ürək əzələsi iltihabı) və perikardit (ürək qişası iltihabı) riskinin olduğu bildirilib.

BAKU.WS sondakika-ya istinadən xəbər verir ki, FDA bu qərarı ötən il yayımlanan tədqiqat nəticələri və yeni statistik göstəricilər əsasında qəbul edib. Daha əvvəl Pfizer üçün 12-17, Moderna üçün 18-24 yaş aralığı riskli hesab olunurdu. Yeni xəbərdarlıq isə hər iki vaksin üçün 16-25 yaş arası kişiləri əhatə edir.

FDA-nın məlumatına görə, 2023–2024-cü illərdə vurulan mRNA peyvəndlərindən sonra bu yaş qrupunda ürək iltihabı hallarının ən yüksək səviyyədə olduğu müşahidə edilib. Rəsmi statistikaya əsasən, hər bir milyon doza görə təxminən 8 belə hal qeydə alınıb.

Peyvəndlərin Comirnaty (Pfizer-BioNTech) və Spikevax (Moderna) adlı variantlarının etiketlərinə yaxın zamanda yenilənmiş xəbərdarlıqların əlavə olunacağı gözlənilir.